Nënkryetari i Lidhjes Demokratike të Kosovës, Lutfi Haziri, ka bërë të ditur se Kryesia e partisë po zhvillon një debat të brendshëm mbi dy çështje thelbësore: analizën e rezultatit të fundit zgjedhor dhe kërkesat për bashkëpunim politik në ndërtimin e institucioneve të reja. Ai theksoi se nuk ekziston asnjë arsye apo hapësirë për të menduar mbi opsionin e zgjedhjeve të jashtëzakonshme në vjeshtën e këtij viti. Ftesa e marrë së fundmi nga lideri i LVV-së, Albin Kurti, për bashkëpunim me PDK-në dhe LDK-në, po trajtohet dhe diskutohet brenda strukturave të LDK-së, ku do të jepen sqarimet e nevojshme në përfundim të këtij procesi. Haziri nënvizoi rëndësinë e kulturës politike dhe rolin shtetformues të LDK-së, duke theksuar se bashkëpunimi politik mbetet një vlerë dhe prioritet për partinë në këtë fazë.