Ministri për Punë, Familje dhe Vlerat e Luftës Çlirimtare, Andin Hoti, njoftoi se gjatë vitit 2026 do të procedohen 6 projektligje prioritare dhe do të bëhet vlerësimi retrospektiv (ex-post) i 3 ligjeve kyçe që prekin kategoritë më të ndjeshme të drejtësisë sociale në Kosovë. Në fokus janë ligjet për skemat pensionale, veteranët e luftës së UÇK-së, dhe statusin e dëshmorëve, invalidëve, veteranëve dhe familjeve të tyre. Procesi i vlerësimit ka për qëllim të analizojë zbatimin praktik të ligjeve, efektet në terren dhe nevojën për ndryshime apo plotësime, duke synuar një legjislacion funksional dhe të drejtë. Ministria do të informojë publikun në çdo fazë dhe do të përfshijë aktorët institucionalë, shoqërinë civile dhe kategoritë e prekura për të siguruar transparencë dhe përfshirje të gjerë.