Zëvendëskryeministri i Parë dhe Ministri për Çështje Evropiane, Bekim Sali, prezantoi në Kuvendin e Maqedonisë së Veriut Propozim-Ligjin për Përfaqësim të Drejtë dhe Adekuat, i cili u shqyrtua në lexim të parë në Komisionin për Sistem Politik dhe Marrëdhënie Ndërmjet Bashkësive. Ky ligj synon të rregullojë në mënyrë sistemore dhe të plotë përfaqësimin e drejtë dhe adekuat të bashkësive në institucionet publike, duke e ngritur këtë parim në nivel ligjor dhe duke e bazuar në Marrëveshjen Kornizë të Ohrit. Ligji parashikon një kornizë institucionale të qartë, e cila do të mbështetet në të dhëna reale dhe nevoja konkrete, si dhe mekanizma monitorimi për zbatimin e tij, duke garantuar trajtim të barabartë dhe parandalimin e keqpërdorimeve. Sipas Bekim Salit, ky propozim-ligj do të forcojë besimin në institucionet publike dhe do të avancojë kohezionin shoqëror në një shtet me karakter multietnik.