Ministri në detyrë i Punëve të Brendshme, Xhelal Sveçla, ka sqaruar se Neni 31 i Ligjit për Shtetësinë të Kosovës nuk është një dispozitë e re, por buron nga Kushtetuta e Kosovës dhe Pakoja e Ahtisaarit, duke qenë pjesë e legjislacionit që nga viti 2008. Ai theksoi se kjo dispozitë nuk është krijuar apo njohur nga qeveria aktuale, por është bartur në dispozitat themelore të Kushtetutës në vitin 2012 nga partitë që sot janë në opozitë. Sveçla shtoi se ligji i ri për shtetësinë nuk ka hapur rrugë të reja për fitimin e shtetësisë dhe nuk ka ndryshuar kriteret materiale, por vetëm ka bërë një harmonizim teknik të formulimit ligjor me Kushtetutën. Drejtori i Departamentit Ligjor në MPB, Qëndrim Bytyqi, shtoi se formulimi i nenit është i njëjtë me atë të Kushtetutës dhe ligjet e mëparshme, duke theksuar se ligji i ri njeh të drejtën për shtetësi sipas kritereve të përcaktuara dhe nuk e konsideron automatikisht shtetas çdo person.