Kryetari i Nismës Socialdemokrate, Fatmir Limaj, ka bërë homazhe në Kompleksin Memorial “Adem Jashari” në Prekaz në përvjetorin e Epopesë së Ushtrisë Çlirimtare të Kosovës. Ai ka theksuar se kjo vizitë nuk është thjesht një veprim protokollar, por një moment reflektimi për sakrificën e familjes Jashari dhe të gjithë dëshmorëve që dhanë jetën për lirinë dhe shtetin e Kosovës. Limaj ka nënvizuar se Prekazi mbetet themeli i shtetit dhe simbol i qëndresës kombëtare, ku u vulos rruga drejt pavarësisë me gjakun dhe trimërinë e bijve më të mirë të vendit. Ai ka bërë apel që respekti dhe përkushtimi ndaj sakrificës së tyre të reflektohet në sjelljen e përditshme ndaj shtetit dhe se amaneti i tyre duhet të jetë udhërrëfyes për punën dhe mbrojtjen e Kosovës.