Fatmir Limaj, lideri i Nismës, ka ftuar qytetarët dhe bashkëluftëtarët që të mblidhen në Kleçkë, pranë Kompleksit të Varrezave të Dëshmorëve, për ndezjen e “Zjarrit të Lirisë”. Ky aktivitet do të zhvillohet të premten në orën 19:00 dhe është organizuar në nderim të katër ish-krerëve të Ushtrisë Çlirimtare të Kosovës që po mbahen në Hagë. Përmes një postimi në Facebook, Limaj ka bërë thirrje që ky zjarr të ndizet si simbol i lirimit dhe respektit ndaj Hashim Thaçit, Jakup Krasniqit, Kadri Veselit dhe Rexhep Selimit. Ky tubim pritet të jetë një moment reflektimi dhe solidariteti për figurat kyçe të luftës së Kosovës.