Lista Serbe ka shprehur shqetësime të mëdha për situatën e sigurisë dhe pozitën e serbëve në Kosovë gjatë një takimi me shefin e ri të UNMIK-ut, Peter Due. Kryetari i Listës Serbe, Zlatan Elek, dhe delegacioni i tij diskutuan për sfidat me të cilat përballet komuniteti serb dhe për problemet ditore që ata hasin. Në takim u ngritën shqetësime lidhur me zbatimin e ligjit për të huajt dhe atë për automjetet, të cilat sipas tyre përbëjnë një alarm për komunitetin ndërkombëtar. Përfaqësuesit e Listës Serbe paralajmëruan se nëse kjo qasje vazhdon, ekziston rreziku që të rrezikohet mbijetesa e popullit serb në Kosovë, duke përfshirë dëbimin e mijëra bashkëkombësve dhe rrezikimin e institucioneve vitale.