Njohësi politik Shkëlqim Jakupi ka vlerësuar se Kosova po shkon drejt zgjedhjeve të parakohshme, ndërsa ngjarjet e fundit në Kuvend duket se janë pjesë e një strategjie për të shtyrë afatin e zgjedhjeve deri në muajin dhjetor. Seanca konstituive e Kuvendit u bllokua për shkak të mosmarrëveshjeve mbi zgjedhjen e pesë nënkryetarëve, ku partitë nuk ranë dakord nëse votimi duhet të bëhet veç e veç apo në pako. Përplasjet u thelluan pas propozimeve të Listës Serbe dhe kërkesave të Albulena Haxhiut për ndryshimin e formulimit “në emër të popullit serb”, duke çuar në shtyrjen e seancës dhe bojkotin e Aleancës. Jakupi thekson se këto zhvillime shoqërohen me veprime që ai i konsideron shkelje kushtetuese dhe janë një lojë politike për të fituar kohë deri në zgjedhjet e pritshme në dhjetor, ku pritet të ketë pjesëmarrje më të madhe nga diaspora.