Kryesuesi i Këshillit Prokurorial të Kosovës, Arian Gashi, theksoi se lufta kundër korrupsionit nuk mund të jetë vetëm përgjegjësi e institucioneve të drejtësisë, por kërkon angazhim të përbashkët nga të gjitha nivelet e shtetit dhe qytetarët. Ai vuri në dukje rëndësinë e bashkëpunimit ndërmjet Këshillit Prokurorial dhe Agjencisë për Parandalimin e Korrupsionit, duke e konsideruar këtë një element kyç për ndërtimin e institucioneve demokratike dhe forcimin e besimit të qytetarëve. Gashi përmendi se 20 vjet punë e Agjencisë ka sjellë përparime në transparencë, integritet dhe parandalim të korrupsionit, por sfidat mbeten të mëdha dhe kërkojnë një qasje gjithëpërfshirëse. Ai nënvizoi se vetëm me koordinim dhe përgjegjësi të përbashkët mes institucioneve, shoqërisë civile dhe qytetarëve mund të arrihen rezultate konkrete në këtë betejë.