Ministri në detyrë i Punëve të Jashtme, Glauk Konjufca, ka bërë me dije se institucionet e Kosovës kanë intensifikuar përpjekjet për të goditur rrjetet e spiunazhit, të cilat sipas tij kontrollohen dhe financohen nga Serbia. Gjatë dy-tri viteve të fundit janë arrestuar shtatë ose tetë persona të dyshuar për spiunazh, ndërsa Konjufca ka bërë thirrje për më shumë angazhim nga organet e rendit dhe drejtësisë në zbulimin dhe ndëshkimin e tyre. Ai ka komentuar gjithashtu rastin e Fatmir Shehollit, i akuzuar për spiunazh në favor të Agjencisë Serbe të Inteligjencës, duke theksuar se ky rast tregon qartë orientimin e qeverisë në luftën kundër këtyre rrjeteve. Sheholli është arrestuar në bashkëpunim mes Policisë së Kosovës, AKI-së dhe Prokurorisë Speciale, ndërsa aktakuza përfshin veprat penale të spiunazhit dhe shantazhit.