Jehona Lushaku-Sadriu, shefja e Grupit Parlamentar të LDK-së, ka denoncuar para Kuvendit të Kosovës se mbi 87% e njehsorëve elektrikë masin gabimisht kohën e shpenzimit të energjisë, duke shkaktuar faturim të padrejtë dhe më të shtrenjtë për familjet kosovare. Ajo theksoi se qytetarët janë mashtruar, pasi Qeveria i ka nxitur të kursejnë energjinë duke e përdorur atë në orët e natës me çmim më të lirë, ndërkohë që njehsorët nuk llogarisin saktë shpenzimin në këto orë. Lushaku kërkoi hetim të pavarur dhe auditim të plotë të sistemit të faturimit, dorëheqjen e bordit të ZRrE-së, kompensim për qytetarët për çdo shumë të marrë padrejtësisht, si dhe ndërprerjen e diskutimeve për rritjen e çmimit të energjisë elektrike. Ajo akuzoi Ministrinë e Industrisë, KEDS-in, ZRrE-në dhe KESCO-n për mosveprim dhe dështim në mbrojtjen e konsumatorëve, duke kërkuar përgjegjësi penale për institucionet përgjegjëse.