Arbërie Nagavci, shefja e Grupit Parlamentar të Lëvizjes Vetëvendosje, ka njoftuar se subjekti i saj politik është i gatshëm të kontribuojë në hartimin e një rezolute për mbrojtjen e viktimave të luftës së fundit në Kosovë. Kjo iniciativë vjen pas gabimeve të evidentuara në ekspozitën e hapur më 24 mars në sheshin e Prishtinës, e cila u mbyll pas disa ditësh. Nagavci theksoi se LVV do të delegojë deputetët e saj për të bashkëpunuar me grupet parlamentare të tjera në përgatitjen e një rezolute që trajton në mënyrë shumëdimensional çështjet e luftës. Ajo gjithashtu shprehu pritjen që drafti i rezolutës të paraqitet për miratim në Kuvend deri në fund të ditës.