Zyra Kombëtare e Auditimit ka zbuluar mangësi të shumta në procesin e prokurimit për mirëmbajtjen e autoudhëve A6 dhe A7 për periudhën 2025–2028, duke konstatuar se Ministria e Infrastrukturës dhe Transportit nuk ka respektuar plotësisht parimet e ekonomisë, efikasitetit dhe trajtimit të barabartë. Procedura e prokurimit u iniciua shumë vonë, vetëm 36 ditë para skadimit të kontratave ekzistuese, duke shkurtuar afatet për dorëzimin e ofertave dhe duke çuar në shtyrje dhe zgjatje të procesit për rreth pesë muaj. Për të garantuar vazhdimësinë e mirëmbajtjes gjatë sezonit dimëror, Ministria përdori procedura të negociuara që kufizuan konkurrencën dhe transparencën, duke paguar rreth 2.8 milionë euro për kontrata gjashtëmujore. Auditimi evidentoi gjithashtu çmime shumë të ulëta në ofertat e paraqitura, mungesë analizash të dokumentuara dhe rreziqe për konflikt interesi, pasi kryesuesi i Komisionit të Vlerësimit kishte lidhje profesionale me një operator fitues, pa u trajtuar kjo situatë nga Ministria.