Ministri i Mbrojtjes së Kosovës, Ejup Maqedonci, ka zhvilluar një takim me Blanca Hereza, ushtruese e detyrës së shefes së operacioneve në Divizionin për Operacione të Shtabit të Përgjithshëm të NATO-s. Gjatë takimit, Maqedonci e ka informuar Herezan për zhvillimet aktuale në Ministrinë e Mbrojtjes dhe Forcën e Sigurisë së Kosovës, si dhe për planet e ardhshme të institucionit. Ai ka theksuar rëndësinë e bashkëpunimit të ngushtë me KFOR dhe Ekipin Këshillues dhe Ndërlidhës të NATO-s (NALT) për të avancuar objektivin kryesor të Kosovës, anëtarësimin në NATO. Maqedonci ka nënvizuar se ky anëtarësim do t’i mundësojë Kosovës dhe FSK-së të japin një kontribut më të fuqishëm në ruajtjen e stabilitetit dhe paqes në rajon.