Zëvendëskryeministrja dhe Ministrja e Drejtësisë në detyrë, Donika Gërvalla, njoftoi nënshkrimin e dy marrëveshjeve të rëndësishme ndërkombëtare me Francën në fushën e drejtësisë. Këto marrëveshje, për Ndihmë të Ndërsjellë Juridike në Çështjet Penale dhe për Ekstradim, synojnë të krijojnë mekanizma më efikasë për bashkëpunim juridik, shkëmbim prove dhe informacioni, si dhe ndjekje dhe ekstradim të personave të kërkuar nga drejtësia. Sipas Gërvallës, këto marrëveshje do të forcojnë kapacitetet e institucioneve të Kosovës dhe Francës në luftën kundër krimit të organizuar, korrupsionit dhe kriminalitetit ndërkufitar, duke mos lejuar që askush të gjejë strehë jashtë kufijve shtetërorë. Ky hap vjen pas marrëveshjes së nënshkruar me Belgjikën dhe shënon zgjerimin e rrjetit të bashkëpunimit ndërkombëtar të Kosovës në fushën e drejtësisë.