Përfaqësuesit e platformës “Liria ka Emër” kanë vizituar Shoqatën e të Burgosurve Politikë për të diskutuar organizimin e “Marshit për Liri”, që do të mbahet më 12 shtator në Prishtinë nën moton “Kosova po pret”. Gjatë takimit u theksua rëndësia e mobilizimit gjithëqytetar në mbështetje të ish-udhëheqësve politikë që po përballen me drejtësinë në Hagë, si dhe nevoja për bashkim përtej dallimeve politike. Përfaqësuesit e platformës dhe kryetari i Shoqatës së të Burgosurve Politikë nënvizuan se ky marsh është një shans për të mbrojtur të vërtetën e luftës çlirimtare dhe dinjitetin e Kosovës. Organizatorët bëjnë thirrje për pjesëmarrje të gjerë, duke e konsideruar këtë ngjarje si një moment kyç për të dëshmuar mbështetjen ndaj çlirimtarëve dhe drejtësisë në vend.