Më 12 shtator në sheshin “Skënderbeu” në Prishtinë do të mbahet marsh i organizuar në mbështetje të ish-krerëve të Ushtrisë Çlirimtare të Kosovës, të cilët po gjykohen nga Gjykata Speciale në Hagë për krime të pretenduara lufte. Kryetari i Nismës Socialdemokrate, Fatmir Limaj, dhe kryetari i Partisë Demokratike të Kosovës, Bedri Hamza, kanë bërë thirrje për pjesëmarrje masive, duke theksuar rëndësinë e bashkimit për mbrojtjen e historisë dhe vlerave kombëtare. Po ashtu, kryetari i Partisë Demokratike Ashkanli të Kosovës, Qazim Rrahmani, ka ftuar komunitetin ashkanli dhe gjithë qytetarët të bashkohen në këtë marsh për të shprehur mbështetjen për luftën dhe kontributin e UÇK-së. Organizatorët e platformës “Liria ka Emër” kanë paralajmëruar aktivitete të ndryshme përkrahëse deri më 16 shtator, ditën kur pritet shpallja e aktgjykimit për katër ish-krerët e UÇK-së.