Komisionarja evropiane për Zgjerim, Marta Kos, theksoi para Parlamentit Evropian se vendet që synojnë anëtarësimin në Bashkimin Evropian duhet të jenë demokraci të forta dhe të qëndrueshme, të afta t’i rezistojnë ndikimeve të jashtme, përfshirë ato nga Rusia. Ajo paralajmëroi se BE-ja nuk do të pranojë asnjë shtet që mund të dëmtojë Unionin nga brenda, duke theksuar nevojën për masa mbrojtëse dhe reforma të thella në procesin e zgjerimit. Në këtë kontekst, Serbia është vënë në shënjestër për refuzimin e harmonizimit me politikën e jashtme të BE-së dhe për mosvendosjen e sanksioneve ndaj Rusisë, çka ka ngrirë negociatat e saj për anëtarësim që nga dhjetori i vitit 2021. Ndërkohë, Mali i Zi dhe Shqipëria vazhdojnë procesin e integrimit, por edhe ato janë nën vëzhgimin e Brukselit për reformat në sundimin e ligjit dhe lirinë e medias.