Komisionarja evropiane për Zgjerim, Marta Kos, do të përgjigjet më 20 prill para Komisionit për Punë të Jashtme të Parlamentit Evropian lidhur me pretendimet për bashkëpunim me policinë sekrete jugosllave, UDB-a. Akuzat u përforcuan pas publikimit të librit “Komisionarja” nga autori slloven Igor Omerza, i cili paraqet dokumente që sipas tij dëshmojnë bashkëpunimin e Kos me strukturat e sigurisë të ish-Jugosllavisë. Komisioni Evropian mohon këto akuza dhe thekson se gjatë procesit të verifikimit për emërimin e saj nuk u gjet asnjë konflikt interesi. Mbledhja e 20 prillit do të jetë hera e parë që Kos do të ketë mundësinë të përgjigjet pas publikimit të fakteve të reja, ndërsa më parë kishte anuluar një takim të planifikuar për shkak të agjendës së ngarkuar.