Ushtruesja e Detyrës së Presidentes së Kosovës, Albulena Haxhiu, së bashku me zëvendëskryeministren Donika Gërvalla-Schwarz, takuan të mbijetuarit e dhunës seksuale gjatë luftës dhe përfaqësues të organizatave mbështetëse në Ditën Ndërkombëtare për Eliminimin e Dhunës Seksuale. Në takim u diskutuan sfidat dhe nevojat e të mbijetuarve, si dhe roli i organizatave që ofrojnë mbështetje psikologjike, ligjore dhe dokumentuese. Haxhiu theksoi rëndësinë e rishikimit të afateve për aplikim, lirimin nga taksat gjyqësore dhe krijimin e një hapësire më të qasshme për Komisionin e Verifikimit për njohjen e statusit të të mbijetuarve. Masat e propozuara synojnë të ndërtojnë një sistem më të drejtë, human dhe dinjitoz, duke respektuar nevojat e personave që kanë përjetuar dhunë seksuale gjatë luftës.