Kryetarja e Kuvendit të Kosovës, Albulena Haxhiu, nga Krusha e Vogël theksoi se masakrat e kryera gjatë luftës në Kosovë mbeten plagë të hapura për shoqërinë dhe familjet që humbën të dashurit e tyre. Ajo kujtoi vrasjen e 155 civilëve shqiptarë, përfshirë gra, fëmijë dhe një grua shtatzënë, si dhe shkatërrimin sistematik të shtëpive dhe objekteve të trashëgimisë kulturore në përpjekje për të zhdukur provat dhe kujtesën historike. Haxhiu nënvizoi se këto krime ishin pjesë e një operacioni shtetëror serb dhe se mungesa e drejtësisë vazhdon të rëndojë mbi familjet e viktimave. Ajo gjithashtu informoi për hapat konkretë të institucioneve të Kosovës në themelimin e mekanizmave për hulumtim, dokumentim dhe ndjekje të krimeve të luftës, duke përfshirë edhe mundësinë e gjykimit në mungesë ndaj kriminelëve që gjenden jashtë Kosovës.