Kryenegociatori i Kosovës me Bashkimin Evropian, Jeton Zulfaj, ka theksuar rëndësinë e mbështetjes së Gjermanisë për avancimin e Kosovës drejt anëtarësimit në BE. Në takim me ambasadorin gjerman Rainer Rudolph, Zulfaj nënvizoi se për Kosovën, anëtarësimi nuk është vetëm formalitet, por një proces që forcon demokracinë dhe zhvillimin ekonomik. Ai falënderoi Gjermaninë për përkrahjen e vazhdueshme dhe theksoi rolin e saj në procesin e zgjerimit të BE-së dhe integrimin rajonal përmes Procesit të Berlinit. Diskutimet përfshinë edhe ecurinë e reformave që Kosova po zbaton në kuadër të Planit të Rritjes.