Kryesuesi i Këshillit Prokurorial të Kosovës, Arian Gashi, së bashku me anëtarët e KPK-së dhe Drejtorin e Përgjithshëm të Sekretariatit, zhvilluan një takim me Kryeprokurorin e Shtetit, Zejnullah Gashi, ku u riafirmua mbështetja e plotë institucionale për funksionimin e pavarur dhe efikas të prokurorisë. Gashi theksoi rëndësinë e koordinimit ndërinstitucional për ngritjen e kapaciteteve profesionale dhe avancimin e reformave në sistemin e drejtësisë, si dhe për forcimin e besimit të qytetarëve. Në fokus të bashkëpunimit mbetet lufta kundër korrupsionit të nivelit të lartë, krimit të organizuar dhe çdo forme tjetër kriminaliteti, me angazhim për profesionalizëm, integritet dhe paanshmëri në zbatimin e ligjit. Kryeprokurori falënderoi KPK-në për mbështetjen dhe theksoi rëndësinë e bashkëpunimit të ngushtë për realizimin e mandatit kushtetues dhe rritjen e efikasitetit të sistemit prokurorial.