Zëvendësministri në detyrë i Punëve të Brendshme, Enver Dugolli, vizitoi Qendrën Kombëtare për Menaxhimin e Kufirit (QKMK), ku u informua për funksionimin dhe bashkëpunimin ndërinstitucional mes agjencive përgjegjëse për menaxhimin e kufijve të Kosovës. Gjatë takimit u vlerësua progresi i QKMK-së, i mundësuar nga investimet e Qeverisë së Kosovës dhe mbështetja e donatorëve ndërkombëtarë, sidomos SHBA-së, që kanë forcuar kapacitetet për luftimin e krimit ndërkufitar. Dugolli përgëzoi stafin për rezultatet e arritura dhe premtoi mbështetje për avancimin, modernizimin dhe përmirësimin e metodave të punës në QKMK. Ai riafirmoi angazhimin e Ministrisë së Punëve të Brendshme për forcimin e kapaciteteve të Qendrës me qëllim rritjen e efikasitetit në menaxhimin e kufijve dhe luftimin e dukurive kriminale.