Gjatë vitit 2025, më shumë se 10 mijë qytetarë në Kosovë kanë përfituar ndihmë juridike falas përmes Agjencisë për Ndihmë Juridike, e cila operon në kuadër të Ministrisë së Drejtësisë. Kjo ndihmë ka qenë veçanërisht e fokusuar te grupet më të cenueshme, përfshirë viktimat e dhunës në familje, komunitetet joshumicë, pensionistët dhe nënat vetushqyese. Në hapjen e “Javës për Ndihmë Juridike Falas”, ministrja në detyrë e Drejtësisë, Donika Gërvalla-Schwarz, theksoi rëndësinë e qasjes reale në drejtësi si garanci për barazi dhe mbrojtje të të drejtave të qytetarëve, duke theksuar se ndihma juridike falas është shumë më tepër se një shërbim shtetëror.