Në vetëm 24 orë, mbi 16 mijë qytetarë kanë nënshkruar peticionin e iniciuar nga Organizata e Veteranëve të Luftës së UÇK-së dhe organizata të tjera përkatëse, në mbështetje të ish-liderëve të Ushtrisë Çlirimtare të Kosovës që po mbahen në Hagë nga Dhomat e Specializuara. Peticioni kërkon që vendimet për ta të bazohen ekskluzivisht në prova dhe fakte të administruara në gjykim, duke theksuar nevojën për një proces të drejtë, transparent dhe të paanshëm, pa ndikime politike që mund të dëmtojnë kredibilitetin e drejtësisë ndërkombëtare. Në kërkesat e peticionit përfshihen respektimi i plotë i të drejtave themelore të të akuzuarve, trajtim dinjitoz dhe heqja e menjëhershme e masës së paraburgimit për shkak të kohëzgjatjes së jashtëzakonshme të procesit. Gjithashtu, kërkohet përjashtimi i provave të siguruara nga autoritetet serbe dhe eliminimi i konceptit të përgjegjësisë komanduese në kontekstin e luftës në Kosovë, duke theksuar se përgjegjësia penale duhet të jetë individuale dhe e bazuar në prova konkrete.