Një peticion kombëtar në mbështetje të ish-krerëve të Ushtrisë Çlirimtare të Kosovës, të cilët po gjykohen në Hagë, ka mbledhur mbi 20 mijë nënshkrime online brenda 10 ditëve. Ky peticion është organizuar nga Organizata e Veteranëve të Luftës së UÇK-së dhe synon të mbledhë rreth një milion nënshkrime, të cilat do t’i dorëzojë Dhomave të Specializuara të Kosovës si shprehje kundërshtimi ndaj asaj që ata e konsiderojnë padrejtësi dhe devijim të misionit të gjykatës. Nënkryetari i OVL-UÇK-së, Gazmend Syla, thekson se aktivitetet kundërshtuese nuk do të ndalen deri në lirimin e katërshes, duke paralajmëruar takime me personalitete ndërkombëtare dhe protesta të tjera.