Ministria e Punëve të Jashtme dhe Diasporës e Kosovës ka bërë të ditur se aktualisht mbi 900 qytetarë të Kosovës ndodhen në vende të ndryshme të Lindjes së Mesme, përfshirë Izraelin, Arabinë Saudite, Emiratet e Bashkuara Arabe, Katarin, Kuvajtin, Bahreinin dhe Omanin. Sipas informacioneve nga misionet diplomatike, të gjithë qytetarët janë në gjendje të mirë shëndetësore dhe janë në komunikim të vazhdueshëm me institucionet kosovare për ofrimin e mbështetjes së nevojshme. MPJD po koordinon me autoritetet lokale dhe shtetet përkatëse për të siguruar opsione evakuimi në rast nevoje, ndërsa u bën thirrje qytetarëve të shmangin udhëtimet dhe të ndjekin udhëzimet e autoriteteve deri në stabilizimin e situatës. Aktualisht janë të disponueshme disa opsione fluturimi dhe kufijtë tokësorë mes Emirateve të Bashkuara Arabe dhe Omanit mbeten të hapur, por udhëtimet rekomandohen të bëhen vetëm me përgjegjësi individuale për shkak të situatës së paparashikueshme në rajon.