Ministria e Bujqësisë, Pylltarisë dhe Zhvillimit Rural (MBPZHR) ka organizuar një punëtori dyditore me temën “Politikat Mbështetëse përmes Programit të Pagesave Direkte, Programit të Zhvillimit Rural dhe projekteve në sektorin e ujitjes”. Qëllimi i kësaj pune është diskutimi dhe avancimi i politikave mbështetëse për zhvillimin e sektorit bujqësor në Kosovë. Ministri Armend Muja theksoi se prioritet janë rritja e prodhueshmërisë, përkrahja e fermerëve të rinj, diversifikimi i aktiviteteve ekonomike në zonat rurale, si dhe zhvillimi i sistemit të ujitjes dhe sektorit të pyjeve. Gjatë punëtorisë u trajtuan sfidat e fermerëve, përmirësimi i skemave mbështetëse dhe rritja e efikasitetit të programeve të subvencioneve dhe investimeve në bujqësi, duke synuar zhvillimin e qëndrueshëm dhe modernizimin e sektorit.