Ministrja në detyrë e Mjedisit dhe Planifikimit Hapësinor, Fitore Pacolli, ka marrë një vendim të rëndësishëm për të forcuar mbrojtjen e drunjve urbanë dhe hapësirave të gjelbra në gjithë Kosovën. Ky vendim ndalon prerjen, krasitjen ekstreme dhe zhvendosjen e drunjve pa pëlqimin paraprak të Ministrisë, duke detyruar komunat të bëjnë inventarizimin e plotë të drunjve dhe të zbatojnë standarde të qarta mbrojtjeje. Vendimi vjen pas reagimeve të shumta që shkaktoi prerja e dhjetëra drunjve në Gjilan, në një projekt komunal të udhëhequr nga kryetari Alban Hyseni, duke nxitur debat mes ambientalistëve dhe përkrahësve të projektit. Për çdo dru të larguar do të zbatohet parimi "1 me 3", që garanton mbjelljen dhe mirëmbajtjen e tre drunjve të rinj, ndërsa çdo projekt që prek hapësirat e gjelbra do të kalojë në procedura të rrepta të vlerësimit mjedisor.