Avokati i ish-presidentit të Kosovës, Hashim Thaçi, Luka Misetiq, ka dorëzuar dosjen përfundimtare gjyqësore në Gjykatën Speciale, ku kërkon shpalljen e pafajësisë së klientit të tij dhe lirimin e menjëhershëm. Në këtë dosje, mbrojtja argumenton se dënimi maksimal i mundshëm sipas ligjit në kohën e kryerjes së veprave penale është 15 vjet dhe se Gjykata Speciale nuk ka kompetencë kushtetuese të shqiptojë dënime më të larta. Mbrojtja thekson gjithashtu faktorë lehtësues, si dorëheqja e Thaçit nga presidenca, bashkëpunimi i tij me Prokurorinë Speciale dhe qëndrimet e tij për paqen dhe moshakmarrjen gjatë konfliktit të vitit 1999. Ndërkohë, Prokuroria ka kërkuar 45 vjet burgim për Thaçin dhe ish-krerët e tjerë të UÇK-së, të cilët qëndrojnë në paraburgim që nga nëntori i vitit 2020, të akuzuar për krime lufte dhe kundër njerëzimit.