Merkur Smajlaj është përzgjedhur në listën prestigjioze të Forbes-it “30 Under 30 Europe 2026” për punën e tij në ruajtjen e hidrogjenit dhe inovacionin në energjinë e pastër. Ai është përgjegjës për kërkim dhe zhvillim në startup-in austriak HydroSolid, i cili përdor materiale të avancuara për të ruajtur hidrogjenin në presion shumë më të ulët dhe në mënyrë më të sigurt dhe efikase, duke ulur emetimet e CO2. Kompania ka mbledhur 3.5 milionë dollarë investime dhe ka bashkëpunuar me kompani të mëdha si Stellantis dhe Boeing në projekte të Bashkimit Evropian. Ushtruesja e detyrës së presidentes së Kosovës, Albulena Haxhiu, e ka përgëzuar publikisht Smajlajn, duke theksuar se kjo arritje pasqyron talentin dhe përkushtimin e të rinjve që po formësojnë të ardhmen dhe duke shprehur krenarinë e Kosovës për suksesin e tij.