Kryeministri në detyrë i Kosovës, Albin Kurti, ka folur për incidentin e ndodhur në minierën e Trepçës, ku 47 minatorë u bllokuan për shkak të ndërprerjes së furnizimit me energji elektrike. Një defekt në linjën 35 kilovolt Stantërg shkaktoi ndërprerjen, por ekipet emergjente dhe teknike reaguan menjëherë për të rikthyer energjinë dhe nxjerrjen e minatorëve. Nga ora 03:00 deri në 08:00, 29 minatorë dolën nëpërmjet shkallëve emergjente, ndërsa pjesa tjetër u nxorr më vonë, në ora 14:00, pas lidhjes alternative të linjës elektrike. Të gjithë punëtorët janë në gjendje të mirë shëndetësore, ndërsa hetimet për shkaqet e avarisë vazhdojnë nga organet kompetente.