Ministri i Infrastrukturës dhe Transportit në Kosovë, Dimal Basha, ka identifikuar tri akse rrugore me rrezik të lartë për qytetarët, ku kërkohen ndërhyrje emergjente. Rrugët e përmendura janë ajo e fshatit Carralevë në komunën e Shtimes, segmenti Klinë–Gurakoc në Krushevë dhe aksin Zhur–Dragash, ku rrëshqitjet e dheut kanë dëmtuar seriozisht trupin e rrugës. Për rrugën në Carralevë, projekti i rehabilitimit është i gatshëm dhe ministri ka kërkuar nisjen e menjëhershme të procedurave pas miratimit të buxhetit. Ndërsa për segmentet e tjera, kërkohet përgatitja e planeve inxhinierike për sanim emergjent dhe më pas rehabilitimi i tyre sipas procedurave zyrtare. Ministri Basha falënderoi administratën për bashkëpunimin dhe theksoi nevojën për veprim efikas dhe koordinim institucional në shërbim të sigurisë së qytetarëve.