Në ditën e tij të parë në detyrën e Ministrit për Evropën dhe Punët e Jashtme, Ferit Hoxha ka mbledhur shtabin e posaçëm dhe ekipin drejtues për të adresuar situatën e sigurisë në Lindjen e Mesme. Fokusi i takimit ishte gjendja dhe nevojat e qytetarëve shqiptarë, qoftë rezidentë apo me qëndrim të përkohshëm në rajon, ndërsa përfaqësitë diplomatike janë në kontakt të vazhdueshëm me ta për informacion dhe asistencë. Ministri Hoxha theksoi se siguria dhe mirëqenia e shtetasve shqiptarë mbeten përparësi absolute dhe se strukturat e shërbimit të jashtëm janë në gatishmëri të plotë për të marrë çdo masë të nevojshme në varësi të zhvillimeve në vendet e prekura. Ai falënderoi Kryeministrin dhe Presidentin për besimin dhe premtoi përkushtim dhe përgjegjësi në detyrën e re, duke vënë në dukje eksperiencën e tij të gjatë në shërbimin diplomatik dhe rëndësinë e rritjes së besueshmërisë së Shqipërisë në arenën ndërkombëtare.