Ministri i Punës, Familjes dhe Vlerave të Luftës së UÇK-së, Andin Hoti, ka marrë vendim për nisjen e një aksioni të jashtëzakonshëm kombëtar të inspektimeve në sektorin me rrezik të lartë, veçanërisht në ndërtimtari, pas vdekjes së një punëtori në Ferizaj. Ky aksion do të zhvillohet në të gjithë territorin e Kosovës dhe do të përqendrohet në rritjen e sigurisë dhe shëndetit në punë, me qëllim parandalimin e aksidenteve dhe forcimin e zbatimit të legjislacionit në fuqi. Inspektorati Qendror i Punës është urdhëruar të hartojë një plan emergjent dhe të realizojë inspektime intensive, përfshirë edhe ditët e festave dhe jashtë orarit të punës, për një periudhë prej 15 ditësh. Ministri Hoti ka paralajmëruar se çdo kompani që nuk garanton kushtet bazike të sigurisë do të ndalohet menjëherë dhe do të ndëshkohet sipas ligjit deri në përmbushjen e standardeve të kërkuara.