Kryeministri i Kosovës, Albin Kurti, do të presë nesër në një takim zyrtar zëvendëskryeministrin dhe ministrin e Punëve të Jashtme të Belgjikës, Maxime Prévot, në ndërtesën e Qeverisë së Kosovës. Takimi do të fillojë në orën 13:30 dhe mediat do të kenë mundësi të marrin pamje para nisjes së takimit në oborrin e Qeverisë. Ministri belg do të vizitojë gjatë këtyre ditëve disa vende të Ballkanit Perëndimor, duke përfshirë Kosovën, Malin e Zi, Serbinë, Maqedoninë e Veriut dhe Bosnjë Hercegovinën, ndërsa Shqipërinë do ta vizitojë më vonë për hapjen e ambasadës belge në Tiranë. Ai ka theksuar rëndësinë e ruajtjes së një perspektive të besueshme integrimi për gjashtëshen e Ballkanit Perëndimor, duke theksuar se procesi i anëtarësimit në BE duhet të bazohet në merita dhe zbatimin e reformave të nevojshme në sundimin e ligjit, sistemin gjyqësor, luftën kundër korrupsionit dhe pajtimin rajonal.