Ministri i Punëve të Brendshme, Xhelal Sveçla, priti në takim Komisionerin e Lartë të OSBE-së për Minoritetet, Christophe Kamp, duke e falënderuar për mbështetjen e vazhdueshme në fuqizimin e kapaciteteve institucionale të ministrisë. Gjatë takimit u diskutuan angazhimet për zbatimin e Ligjit për të Huaj dhe veprimet për integrimin e shëndetësisë dhe arsimit në pjesën veriore të Kosovës, në përputhje me kornizën ligjore të vendit. Ministri Sveçla informoi Komisionerin Kamp edhe për përfshirjen e komuniteteve në institucionet shtetërore dhe shërbimet publike. Ai rikonfirmoi përkushtimin e ministrisë për respektimin dhe garantimin e të drejtave të komuniteteve dhe për krijimin e një ambienti të sigurt dhe të qetë për të gjithë qytetarët.