Ministri i Mbrojtjes i Shqipërisë, Pirro Vengu, zhvilloi një vizitë zyrtare në Budapest me qëllim thelbësor investimin në inovacion dhe forcimin e industrisë së mbrojtjes. Gjatë vizitës, ai takoi përfaqësues të kompanisë Pro Patria Electronics, e specializuar në radarë dhe sisteme për mbrojtjen e infrastrukturave kritike, ku u njoh me kapacitetet teknologjike dhe modelin e zhvillimit industrial të kompanisë. Vengu theksoi se Hungaria është një shembull i suksesshëm i investimeve të qëndrueshme në këtë sektor, duke nxitur krijimin e kapaciteteve reale dhe vlerave strategjike në Europën Qendrore. Synimi i vizitës është integrimi i industrisë shqiptare të mbrojtjes në zinxhirët e furnizimit dhe inovacionit të vendeve aleate, për të ndërtuar aftësi të qëndrueshme, të besueshme dhe plotësisht ndërvepruese në Forcat e Armatosura.