Ministri i Shëndetësisë, Arben Vitia, ka bërë publike të gjitha barnat që ndodhen në stokun e Shërbimit Spitalor dhe Klinik Universitar të Kosovës (SHSKUK), pas raportimeve për mungesa të barnave esenciale, veçanërisht për pacientët me kancer në QKUK. Ai theksoi se ka pasur raportime të vazhdueshme, shpeshherë të pakonfirmuara, dhe për këtë arsye kërkoi që lista e barnave të jetë e aksesueshme për qytetarët dhe mediat në faqen zyrtare të SHSKUK-së. Ministri bëri thirrje që qytetarët të raportojnë menjëherë nëse hasin mungesa të barnave që janë në stok, duke garantuar ndërhyrje të shpejta dhe masa adekuate. Ai pranoi se mungesa tranzitore mund të ndodhin për shkak të vonesave nga operatorët ekonomikë, të cilët penalizohen sipas ligjit, por theksoi se transparenca dhe bashkëpunimi me qytetarët janë kyçe për zgjidhjen e situatës.