Ministrja e Mjedisit dhe Planifikimit Hapësinor, Fitore Pacolli, ka marrë vendim për nisjen e procesit të rikthimit të rrjedhës së lirë natyrore të lumenjve në Kosovë. Ky vendim synon identifikimin dhe largimin gradual të pengesave të vjetruara në shtretërit e lumenjve, përfshirë digat e vogla dhe pragjet që janë jashtë funksionit dhe dëmtojnë ekosistemin ujor. Pacolli thekson se ky proces do të përmirësojë cilësinë e ujit, do të rikthejë migrimin natyror të faunës ujore dhe do të zvogëlojë rreziqet nga përmbytjet që shkaktohen nga bllokimi i mbeturinave dhe drunjve gjatë prurjeve të mëdha. Ministrja nënvizon rëndësinë e lumenjve të lirë për shëndetin e natyrës dhe sigurinë e qytetarëve.