Ministri i Arsimit, Hajrullah Çeku, paraqiti para deputetëve projektligjin për Provimin e Maturës Shtetërore, duke theksuar rëndësinë e tij për nxënësit, prindërit dhe sistemin arsimor. Ai pranoi se për shkak të volumit të madh të punës në ministri nuk ka mundur të ndjekë zhvillimet e fundit në detaje, por beson se personat e angazhuar janë më të informuar. Më 3 prill, Qeveria e Kosovës miratoi këtë projektligj, duke shënuar një hap të rëndësishëm në avancimin e cilësisë dhe besueshmërisë së arsimit në vend. Kryeministri Albin Kurti vlerësoi se ligji vendos një standard të ri serioziteti dhe meritokracie, duke konsoliduar maturën si një mekanizëm të drejtë dhe konkurrues për të gjithë nxënësit.