Profesori i Ekonomisë, Shkumbin Misini, ka kritikuar ashpër politikanët kosovarë për mungesë përgjegjësie dhe indiferencë ndaj qytetarëve, duke theksuar se kjo i detyron shumë prej tyre të emigrojnë për shkak të kushteve të vështira dhe mungesës së mbështetjes nga shteti. Ai vuri në dukje se politikanët nuk janë prekur nga problemet reale të qytetarëve, pasi asnjë fëmijë i tyre nuk ka emigruar në 10-20 vitet e fundit, ndërsa qytetarët e zakonshëm luftojnë për ekzistencë. Misini përmendi pasigurinë juridike dhe ekonomike, si dhe mungesën e sigurimeve shëndetësore si arsye kryesore për largimin e njerëzve. Ai kritikoi faktin që deputetët bëjnë operacione jashtë vendit, ndërsa qytetarët nuk kanë as sigurim shëndetësor dhe përballen me pritje të gjata për ndërhyrje mjekësore.