Organizatat partnere të platformës së Këshillit të Evropës për sigurinë e gazetarëve do të zhvillojnë më 24 dhe 25 mars një mision faktmbledhës dyditor në Kosovë, me qëllim adresimin e sfidave që lidhen me lirinë e medias dhe diskutimin e zgjidhjeve të mundshme me përfaqësues të mediave dhe autoriteteve. Gjatë qëndrimit, delegacioni do të trajtojë çështje si presioni politik ndaj mediave, siguria dhe kushtet e punës së gazetarëve, legjislacioni për media dhe amendamentet e propozuara, si dhe transpozimin e Direktivës Evropiane kundër padive abuzive (SLAPP). Kryeministri Albin Kurti ka konfirmuar takimin me delegacionin, ndërsa janë parashikuar edhe takime me redaktorë, gazetarë, anëtarë të komisionit parlamentar për media, përfaqësues të institucioneve gjyqësore, Policisë së Kosovës dhe organeve rregullatore. Pas përfundimit të misionit, do të prezantohen gjetjet fillestare në një konferencë për media në Prishtinë dhe më pas do të publikohet një raport me rekomandime, i cili do t’u shpërndahet organizatave kombëtare dhe ndërkombëtare.