Kuvendi Komunal i Mitrovicës së Veriut miratoi ndryshimet dhe plotësimet në rregulloren për shfrytëzimin e palestrës sportive me 12 vota pro, 1 kundër dhe 1 abstenim. Ndryshimet synojnë rritjen e transparencës dhe vendosjen e prioritetit te fëmijët, të rinjtë dhe aktivitetet shkollore, duke shtuar detaje që përmirësojnë qartësinë e rregullores ekzistuese. Kryetari i Kuvendit, Ivan Zaporozhac, theksoi se ndryshimet nuk shfuqizojnë vendimet e mëparshme, por i plotësojnë ato në interes të qytetarëve dhe sportit në komunë. Në seancë pati debate, ku asamblistja e Vetëvendosjes, Aida Doli-Ferati, kritikoi materialin si të paplotë dhe të paqartë, ndërsa nënkryetarja Adrijana Hoxhiq sqaroi se ndryshimet janë vetëm detaje shtesë dhe nuk ndryshojnë thelbin e rregullores.