Instituti i Kosovës për Drejtësi (IKD) ka nisur në Mitrovicë një nismë legjislative qytetare për ndryshimin dhe plotësimin e Kodit Penal të Republikës së Kosovës. Aktiviteti për mbledhjen e nënshkrimeve po zhvillohet në Sheshin “Isa Boletini” dhe do të vazhdojë deri në orën 15:00, ku qytetarët kanë mundësi të informohen dhe të mbështesin propozimet. Nisma synon të përcaktojë si vepër penale moszbatimin e qëllimshëm të vendimeve të Gjykatës Kushtetuese dhe të ndalojë përdorimin e parasë publike për përfitim elektoral gjatë periudhave zgjedhore dhe parazgjedhore. Përkrahja për këtë iniciativë vjen edhe nga organizatat e shoqërisë civile, të cilat kanë vizituar stendën e IKD-së dhe kanë dhënë nënshkrimet e tyre, duke theksuar rëndësinë e forcimit të sundimit të ligjit dhe mbrojtjes së integritetit të procesit zgjedhor.