Ministrja e Kulturës dhe Turizmit, Saranda Bogujevci, së bashku me zëvendësministren Nora Arapi-Krasniqi, pritën në takim Shefin e UNDP-së në Kosovë, Nuno Queiros, ku diskutuan për thellimin e bashkëpunimit ndërmjet Ministrisë dhe UNDP-së në fushën e kulturës, trashëgimisë kulturore dhe zhvillimit të turizmit të qëndrueshëm. Gjatë takimit u vlerësua mbështetja e vazhdueshme e UNDP-së në projekte që kontribuojnë në zhvillimin ekonomik lokal, fuqizimin e komuniteteve dhe promovimin e potencialit kulturor e turistik të Kosovës. Ministrja Bogujevci theksoi rëndësinë e partneriteteve strategjike për realizimin e projekteve me ndikim afatgjatë dhe u dakordua për vazhdimin e bashkëpunimit dhe intensifikimin e angazhimeve të përbashkëta. Ky bashkëpunim synon të forcojë zhvillimin e qëndrueshëm dhe promovimin e vlerave kulturore dhe turistike të vendit.