Ish-komandanti i Ushtrisë Çlirimtare të Kosovës, Nasim Haradinaj, ka bërë thirrje për një mobilizim të madh qytetar më 16 shtator, ditën kur pritet të shpallet vendimi përfundimtar ndaj ish-krerëve të UÇK-së në Hagë. Ai ka kërkuar që qytetarët të mos qëndrojnë pasivë, por të dalin në rrugë për të pritur ish-krerët, duke theksuar se njerëzit duhet të vërshojnë këmbë dhe të mbushin rrugët e Kosovës. Haradinaj shpreh besimin se vendimi do të jetë në favor të tyre dhe shpreson që ata të lirohen, duke kritikuar ata që, sipas tij, kanë bërë plane për të festuar një dënim të mundshëm. Ai gjithashtu shprehet i bindur se në kohë të vështirë amerikanët nuk do të marrin një vendim kundër ish-krerëve të UÇK-së.