Deputeti i LDK-së, Besian Mustafa, ka mohuar kategorikisht se gjatë bisedimeve me kryeministrin në detyrë, Albin Kurti, është diskutuar posti i kryeparlamentarit për LDK-në. Ai ka sqaruar se në takimet ku kanë marrë pjesë pesë persona, përfshirë edhe kryetarin e LDK-së, Lumir Abdixhiku, është ofruar vetëm posti i zëvendëskryeministrit dhe tri ministri. Mustafa ka theksuar se kryeparlamentari nuk është një pozitë që mund të i takojë një deputeti të LDK-së pasi ai përfaqëson shumicën e Kuvendit dhe një deputet i opozitës nuk do të mund ta përfaqësonte atë. Ai gjithashtu është shprehur i habitur nga deklarata e Kurtit, duke theksuar se kjo temë nuk është diskutuar fare në tavolinën e bisedimeve.