Ministria e Punëve të Brendshme ka njoftuar se nga data 16 mars 2026 do të fillojë zbatimi i plotë i Ligjit për të Huajt dhe Ligjit për Automjete, duke mundësuar aplikimet për lejeqëndrim dhe deklarimin e adresës. Ky hap vjen pas periudhës informuese dhe pas deklarimeve të Kryeministrit Albin Kurti dhe përfaqësuesit special të BE-së, Peter Sorensen. Gjatë një periudhe tre mujore do të lejohet regjistrimi i fakteve të lindjes, martesës dhe vdekjes të regjistruara deri më 15 mars në institucionet jolegale serbe, me qëllim integrimin e tyre në Regjistrin Civil të Kosovës. Ministria do të njohë përkohësisht kartat e identitetit të lëshuara nga strukturat jolegale serbe për qëllime identifikimi dhe do të ofrojë udhëzime të plota për qytetarët në bashkëpunim me Agjencinë e Regjistrimit Civil dhe Policinë e Kosovës.